Zu Risiken und Nebenwirkungen lesen Sie unsere Webseite oder fragen Sie Ihren Modellbahnhändler oder Partner.

Kurzschluss 2013

Kurzschluss und de Santi Claus

Dr Santiclaus kunnt jedes Johr
und bringt uns Nüssli, das isch wohr
und au sy Schmutzli isch derby
dä wot jo nid elai dehaime sy.  

Das Johr isch är no e’bitz presiert,
will dr Klaus isch nämlig nonig pensioniert
dä muess no alltag ganz viel schaffe
SWISS-ZOO by syne zahme Affe.  

Jä s’Klaus sy, das isch mängmol schwär
denn sin sini Gschänkseck ändlig lär,
den sötte die zrugg zum Schmutzli Maa
damit dä die wieder für s’nägscht Johr fülle ka  

Ich machs jetzt wie by de igfleischte Chrischte
und erklärs Euch amene Glychnis am beschte
was der Klaus mit sine Frachtsegg am 6. Dezämber macht
das macht dr Präsi by der Swiss in dr Fracht.  

By de Swiss Gepäck-Kischte isch das genau glych
die mine zrugg, sunscht wird d’ Gsellschaft nit rych
damit me wieder Fracht ka lade
mien die Kieschte zrugg in Lade.  

Dä Hösi Ihr kenneten alli jo au
dä macht den by däre Swiss dr Pfau
in riesige, gwaltige Excel-Lischte
sortiert und sammlet Dä alli Kischte.  

Denn schiggt är die Lischte in die ganze Wält
so verdient dä alltag e Huffe Gäld
und befiehlt d’Kollege in dr ganze Wält
schigget Kischte zrugg sunsch grigsch kai Gäld.  

Ihr mient nid mit mir am Telifon flueche
sondern ihr miend jetzt in allne Hangar go sueche
ob Muslim, Katholike oder anderi Chrischte
findet ändlig die fählende Kischte  

Und händ er die Diger denn ändlig gfunde
irgend untere Blache unde
denn dien si schön putze und schigget sy hei
und so sin sy by uns denn nümm so ellei.  

Denn gohts by uns wie im Schwarzwald zue
mir kömme im Winter kum me zur Rueh
dr Schmutzli duet denn dr ganz Dag bache
damit mer wieder schöni Gschänkli könne mache
wo mir den im Sagg unsere Kunde bringe
Und mängmol die mer derzu no singe.  

So gohts au by dr Swiss in dr Abteilig Fracht
wo me us däne Kischte wieder Gschänkkörb macht
und sy in die ganzi Wält verschickt
in dr Hoffnig dass me die lehre wieder ummegit.  

So gseh isch d’Swiss und dr Claus fascht glych
beidi sin an Erfahrig sehr rych
doch dr Hösi macht das nümm lang, är wird pensioniert
also im Mai us dr Swiss useschpediert  

Das mag ich ihm gönne däm liebe Ma
das dä no bitz sy Läbe gniesse ka
doch bin ich froh dass do uf Aerde
d’ Santigläus nie pensioniert dien wärde.  

Drum freu ch my scho ufs nögschte Johr
und gseh sy den gärn wider, dyni wysse Hoor
wenn Du uns wieder Nüssli bringsch
und mit em Schmutzli hoffentlig e Liedli singsch
will Du als Klaus muesch wie anderi Pfaffe
bis ans Läbesändy schaffe.  
Drum Santiclaus damit s au s’nägscht Johr wieder
Gschänkli git
nim dys ULD-Seggli sälber wieder mit    

Kurzschluss, Dezämber 2013