Zu Risiken und Nebenwirkungen lesen Sie unsere Webseite oder fragen Sie Ihren Modellbahnhändler oder Partner.

Kurzschluss 2008

Santi Claus

Scho wieder isch e Johr verby
und es isch mir, als wärs geschter gsy
do isch dr SantiClaus in unsere Waage gloffe
und alli hän gmeint, dä isch doch bsoffe.

Dä het nit so dönt wie in andere Johr
und het glaub au e bitzeli lengeri Hoor,
är sigi krank und sy Ranze dät chnuure
drum däg hüt z’Obe nur dr Schmutzli schnuure.

E neue Chlaus, das isch jetzt glunge
dä het nid emol hösiana gsunge
und dr Schmutzli, do hesch fascht in d‘Hose gmacht
het Sprüch glopft, dass es numme so kracht.

Aber hüt isch alles wieder wies muess sy
dr richtigi Chlaus het dr richtig Schmutzli derby
sy passe guet zum Club do im Dezämber
dr Rot dä isch d’Loki, und dr Bruni sy Tänder.


Die zwai hän glaub e Freud am EFB
wo dr Wage wider duet wie neu usgseh.
Zum Glück isch unsere Präsi hüt nid do
drum kann ich die Gschicht jetzt useloh.

Kum isch dr Wage fertig gstriche gsi
kunnt e härzig Frölein mit Körbli D, und de neue Schrifte verby.
Und in der Swiss hän alli umegfluecht
und überall vergäbens dr Hösi gsuecht.

Dä hesch den gseh, do uf d‘Leitere ufe z‘stiere
und är het nümm ufghört, mit räpresentiere.
Dr Bauchef dä het numme gstutzt
und im Präsi mit em Nastuech als dr Gaifer abputzt.

Är hets sich beruhigt, isch wider ganz dr Alt
het sich und dr ganz Verein in synere Gwalt
Und luegt uns Bube, dass uns nüt passiert
Chönsch meine, dä het uns alli adoptiert.


Jä ich mues scho sage, do gits nüt z’flueche
e‘sone Präsi muesch zerscht go sueche
är het e glai Ränzli, und härzigs Gläzli
und syni Frau, das isch e richtigs Schätzli.
Ei Mangel het är und dass isch z’beduure
er het e sone dummi Zircherschnure.

So jetzt han ich das hüt zobe verby
das wär mi Värsli für Euch zwai Gnome gsi.
Ich ha do liebe Fründe, by am Mittwoch nie elai
Und hoff au ihr chömet hüt wieder guet hai.
 
Kurzschluss

Antropologische Forschig

Die antrpologische Forschig in unserem Land
het scho e lange wichtige Bestand
über Brüch und Kultur in Neuginea gsammlet
wo in de Muesee so vor sich häre gammnlet.

Das Material kriegt jetzt wieder Bedütig
denn dr Forscherdrang, dä wysst eidütig
als Forschigszyl uf yheimische Kuriositäte
wo lengscht scho hätte untersuecht sölle wärde.

Do gsesch in Ziry e Banggdiräggter
är isch sunsch e ordelige und guet gepflägter.
Dä het e rote Bolle uf dr Nase
und e Chäppli use de Fäll vo dote Hase.

Fyhrlich seit är „Gäll du känsch mich nööd,
ich bin halt en luschtige Züribögg.
By dr SBG händ mir halt nüt meh z’lache
drum duent mir jetzt au Fasnacht mache.

Weisch dass mir am Mädnig alli uf Basse labe göhn
verkleidet als Zürrcher Bangge-Clöön
mir händ Schuffle und Seck und gueti Bässe
und göhn dört ko Milliarde Räppli zämme lässe.

So chönnt mir s‘Defizit reduziere
und müend eus nümme e so schiniere
mir duent die Räppli alli an d‘Börse bringe
und derzue es Liedli singe.

Wer kann das bezahlen, wer hat so viel Geld ….
Das isch dr Neu Slogan vo der SBG-Bangge-Wält
Antrpoligisch gseh bringt das nid viel:
Halt typisch Ziircher und licht debil.

Viel interessanter isch das in Luzärn
Es git au Ziircher die hän d’Loztärner schampar gärn
Scho lang duets dä halalpini Volksstamm scho gäh
Drum wänn mer en e bitzelei unter d’Lupe näh.

Die sin bekannt als die beschte Schrotthändler vom ganze Land
Überall liege verbogeni Instrumänt us Messing umenand
Die hän e so komische farbigi Hoose
Und dien unufhaltsam in die Ruine inebloose.

Vor em Gsicht hän sy en Art Massge, es isch no nätt
sy isch us Holz, also useme Brätt
und eifach gsait het dä armi Tropf
eifach numme e Brätt vor em Kopf.

Me fieteret den die Fritschibuebe
als Blaukritzler kasch do fascht nid zuluege
mit Unmängene Sprit und Alkohol
und es ischene zum kotze wohl.

Uf gheimnissvolli Art sind die alli synchronisiert
und obwohl jede nur e bitzeli uf sim Bläch probiert
gits e Saukrach wo sich über Lozärn ine laid
und dämm e dört Guggemuusig seit.

Wie meh dass die bloose, Du kasch es erahne
versufft Lozärn in ere Alkoholdunschtfahne
und alli wo zueluege sin betroffe
und in kürzischter Zyt alli völlig bsoffe.

Jetzt verstohsch worum d’Ziircher gärn dört gehn go loose
sich billig muesch nid sälber eine bloose
und wenn die Mängi denn bsoffe isch
kasch Du vergässe, dass Du e Ziircher bisch.

Jetzt stoht my Chef do näbedra
ich ha ihn gar nid inekoh ghört ka
was mchsch du füre e Saich, ich kum veruggt
schaff jetzt witers am Ziircher Brutto Sozialprodukt.

Also Antropologie – fir hyt isch es aus
schliesslig isch är dr Herr im Haus
aber eins muess ich de EFB-Kollege no sage
und do könne d‘ihr no lang dr gege klage.
Dä Club dä het syni Wurzle in Basel -
nei das isch kai dumms Gefassel
Wysset ihr mini liebe Lyyt
dass es dört scho sit über hundert Johr „Schyssdräggzygli“ git.
 
Kurzschluss

Computer, etc

Möchtest Du Fragen zum Computer haben;
Musst Du nur den Walti fragen.

Macht die Verbindung Dir Kopfzerbrechen;
Kannst Du auch da mit Walti sprechen

Spinnt das Netzwerk wirklich voll;
Hilft abermals der Walti ganz toll

Hast Du betreffend Eisenbahnen komplizierte Fragen;
Walti weiss alles und hilft an allen Tagen

Hast Du Fragen betreffend Gartenarbeiten:
Walti wird Dich an Christa weiterleiten

Hösi

Gugge und Basler

De Guido hät über d'Lozärne Gugge gleschteret...

Loos Guido, Du liebe und ehrewärte Maa
Jetzt muesch aber Nachhilfstunde haa;

D'Guggemusige vo Lozärn
wo meh weltwiit het so gärn;

die tüend nöd numme trümmele und pfiife
sondern spieled vili Instrument, da musch begriife;

muesch jetzt nöd es Tränli vergiesse
fahrsch mal uf Lozärn und tuesch es gniesse;

die spieled sogar im gröschte Delirium
schööner als jede Usbildner am Konservatorium.

Hösi

Vo üserem Hoffnarr

liebi Lyt, wo do voorne hogge
unseri Uussprooch isch nid grad bsunders drogge
bevor ihr nass wärdet, bitte reklamiere
denn wärde mir Partikelfilter montiere

d’Saskia Frei isch root vor Wuet
doorum nimmt si jetz dr Huet
wie’s ooni Politik witer goot
do waiss ihre Maa sicher beschtens Root

dr Chris von Rohr het e bitz e Magge
är zaigt am Fäärnsee sini Fuudibagge
mir zwai begriesse das Verhalte
si Fiidle ka wenigschtens d’Schnuure halte

d’Calmy-Rey, macht es Gschrei
wäg dr Folterei, vo dr CIA
es git no schlimmers, das waiss dr Deiss
lueg Black’n’Blond, uff SF1

mir hän e bitz Hemmige, iine z’saage
dass mir amigs Windle traage
aber soo könne mir, egal, wenn und woo
umme brunze, ooni e Buess z’bikoo

die Haizeelbryyse, do wird’s aim schlächt
wäg dr Granggekasse erscht rächt
do ka’s Di männgmool scho bitz raitze
wie z’Paris, statt mit Eel, mit Auti’s z’haitze

syt däm Länderspiil, nundebuggel
kennt me d’Veranlaagig vom Beni Huggel
die Be-Droffene sind gar nid z’beniide
vor allem die, mit Hemmoriide

liebi Frind, dert ääne am Rhy
an dr Fuessball-WM sin mir denn au derbyy
mit uns als Gegner ka me lääbe
d’Schwizer ka me schloo, uff em Platz und au drnääbe

in de Yysebaane isch es jetz verbotte
Zigis rauche, oder Jöintli z’motte
in de Neigezüüg, au wenn anderi motze
darf me immerno fröhlich witer kotze

es Bierli, es Schnäppsli, und e Fläsche Wyy
no e Liköör als Dessert hindedryy
do kasch suffe und suffe, bis es Dir aafot stingge
d’Angela Merkel kasch aifach nid scheener dringge

letschti hän mir zwai mol welle
per SMS, bi dr SBB, so MMS Byyljee bschtelle
bi dr Byyljee-Kontrolle isch uns s’Lache vergange
dr Kondüktöör macht Lecher in d’Handys, mit sinere Zange.
 
de efb Hoffnarr