Zu Risiken und Nebenwirkungen lesen Sie unsere Webseite oder fragen Sie Ihren Modellbahnhändler oder Partner.

Kurzschluss 2007

Kurzschluss und de Bauchnuschti

Unssere Bauchnuschti, dass isch e nätte
är duet jede Obe vorem schlöffele bätte
„ Du liebe Gott, jetzt los my ah
ich möchte unseri Alag e Obe für my ellai ha.

Und im Terminkaländer vom nägschte Johr
kasch nocheluege, s’isch wirgglig wohr
hett dä Gsell ganz ungeniert,
jede 4. Mittwuch für sich ellai reserviert.

Am 26., das hän mir beschlosse
isch unseri Anlag für alli gschlosse
ganz lyslig sait är: “und macht my s’Chrischtkindli muff
denn mach ich sie heimlig doch wieder uff.“

Me muess dä Ma halt scho begryffe,
s Chrischtchindli hett in die falschi Kischte gryffe
äs hät scho an e FO-Loggi dänggt
het em aber us Versehe - e Büstehalter gschänggt.

Das het unsere Bauchnuschti plötzlig verwandlet
nur e so ka me verstoh worum dä e so handlet
Er schaltet y - git volle Strom uff alli Glais
Und sait: „S’weiss niemer dass ich eigentlig Rumpelstilzli heiss.“

Denn losst är alli die Loggene fahre
die neue, wirgligg scheene und wunderbare
wo är bim umbaue mit Empfänger versehe hett
und mit sine alte Kaibe verwächslet hett.

Jetzt han ich scho dr lieslyg Verdacht
dass dä am 2. Januar wieder s’Glyche macht
drum hebet ich zrugg am Silveschter zoobe
und suffet nid so viel wie gwenlig d’Schwoobe
und am 2. Januar dängget dra
leischte mir Gsellschaft, unserem Bauchnuschti-Maa.

In däm Sinn wünsch ich allne grosse und klaine
die wo ame Fescht syn und däne dehaime
e’ gute Rutsch ins neue Johr
s,Läbe isch doch e wenig eifacher, mit eme Schuss Humor.
 
Kurzschluss

Kurzschluss und Hösi

Hee ! Du graumelierte Maa,
häsch in Bachebüli Näbel gha ?
De vom Tunnelmäss und de Zürcher Schnure,
lahn ich Dir im Fall nöd eifach dure !
Wänn's so währ - hettet d'Zürcher die Schlaue,
de Gubrist scho am Afang 6-spurig baue !
 
Hösi
 
Liebe Hösi, dass isch nit wohr
ich ha keini grau-mellierte Hoor
und mach wäge däm nid sone gschyss
miny Hoor sin nid grau, sondern wyss.

Wenns bi uns Näbel het, Du Dünkel
denn gilt dass jo sicher au für Winkel
und dass Zircher nid kenne plane
dass kasch au ohny Sunneschyn erahne.

Vo Wäge 6-spurig, vo Afang a z’baue
dass würde sich Zircher nie getraue.
Wie wöte die au dä Tunnel bschtelle
Wenn jede an einer Hand nur uf fünf ka zelle.

Und alli Mitglieder vo Stäfe bis Wynige
bekämpfe hüt ihry Entzugserschynige
und göhn hüt zobe ganz frieh ins Bett
will’s Clublokal hüt nid offe het.
 
Kurzschluss

Kurzschluss, de Megge und de Hösi

Uff unsere Anlage, sy isch gigantisch
und in viele Detail au romantisch,
und unter dr Zahnradstrecki vo dr RhB
duet me ne Stroos zum Bärg use koh seh
aber es isch nonig fertig nundefahne
dört köhrt jetzt eifach e Tunnel ane.

Dr Präsi tritt in Aktion
und wändet sich an Basler-Fraktion
mir bitte Euch und hän vertraue
dient uns doch e Tunnel baue,
mit Idee mien ihr gar nit spaare
s mien eifach Auto könne dure fahre.

Jetzt ische es fertig mit der Rueh
an'd Baustell kunsch fascht nid derzue
ich due scho s'erscht mol flueche und wättere
während däm ich uf e Stuehl due klättere
und ich due die Stroosebreiti mässe
wo genau d Magnetspuur isch, hän alli scho vergässe,
also däre Mässig duet me Schätzig sage
ungefähr 2 mol d Breite vomene Wage.

Dehaim zeichnisch e Plan vo däm Modäll
konstruiersch, fosch afo baue ziemlich schnäll,
duesch säge, biege und au chläbe
und loosisch Radio DRS dernäbe
und es isch denn scho e chline Gnuss
gseht das Ding öppe so wie ne Tunnel us.

Voll stolz treisch s'Objäkt am Mittwuchzobe
in Club und hoffsch s dien dy alle lobe
Nur provisorisch stellsch es an sy Platz
do hörsch vom Bauchef scho dr Satz:
Das gseht vom Schiff us, het är gsait
dä Tunnel isch doch zwenig breit.

Erschti Teschtfahrte, sich e Horror gsy
zum Glück sind d'Auto nonig hy
shet crascht und dätscht an alle Egge
wenn nur die Auto nid verregge
es ka nit goh, sich eifach z'glai
ich glaub jetzt gang ich wieder hai.

Die Zürcher sin jo glatti Kaibe
und däne han is welle zaige
wie me z'Basel schnäll ka dängge
und ha däne welle my Tunnel schängge
Dr Hösi maint: Stell doch die Ruine
e mool uf sälere Stroos ins Bärgloch yne.

Und sys Augemaas, es isch famos
my Tunnel goht uf ere andere Stroos
au dört sin scho d Magnetstreife verdeggt
aber sy sin nöcher zämegleggt.
dr Fruscht nimmt ab und ich ka wieder lache
für d RhB muess ich jetzt halt e neue mache.

Dr Megge meint muesch nümme mässe
e gnaui Vermässig kasch do vergässe
Jetzt lueg e mol gnau dr Hösi a
fir dy Tunnel isch das dr richtigi Ma
denn d'Öffnig vom Tunnel, die muess neume duure
genau so breit sy wie ne Zyri-Schnuure.
 
Kurzschluss
 
Mu au wieder mal i’d Taschte griife,
süss tünds all andere ab dä Dächer pfiife:

E richtigi züri Schnurre isch geil,
da lömmer d’Basler abe am Seil!

Mit em Sami chömmemer au us,
s’isch eus gar kän Grus!

Und öbs de richtig oder falisch Sami isch gsi,
Hauptsach er bringt Nüssli und Tessiner Wy!

D’Bysler im Club sind scho rächt,
das isch sogar gar nöd emal schlächt!

Immer am Mittwuch isches glatt,
dänn findet de Fahrabig statt!

I dem Sinn bis nöchschte Mittwuch
 
Megge
 
Da isch doch cho so en glatte Basler um de Rank,
und de Presi seit für's schöne Gedichtli viele Dank; 
 
s' wird jetzt eng mit Dichte,
und verzelle vo luschtige Gschichte;
 
dänn die Baler händ e Profi Schnuure,
da müend d'Zürcher wahrschinlich unde duure;
 
doch jede söll dichte wie's im glint,
eventuell händ mir no Eine wo de Seich mal singt;
 
dänn gänd mir sicher e doppel-CD uuse,
vom Erlös tüend mir dänn grosszügiger huuse !
 
Hösi

Santi Claus

Du, Santi Claus in der roote Roobe
kunsch hüt sicher um uns alli z'lobe
Dört unter dym Rock, s'gseht us wie der Mage
z, Basel wür me däm Ranze sage,
und in Brun hesch derby dä kleini Schutzli
hei, isch das e schnydige Schmutzli.

Du sötsch mit em Schmutzli e mol e Asissment mache
und uf syni Wyterbildig achte,
so könnt dä vylicht Lokifiehrer lehre
wie dr Jim Knopf und anderi Herre
denn köntsch dr Esel dyhaime lo
und mitere geile Loki zue uns ko.

Du hesch's jo schwer mit de Ysebahnbuebe
muesch s'ganz Johr zu däne Glunggi luege
und ich glaub dass duet dy jetzt scho bisse
du kasch uns hüt nid zämmeschisse,
denn dä wo uns fiehrt und leitet und so
dr Hösi, dä isch hüt gar nid do.

Drum due jetzt eifach an uns gwehnligs Fuessvolk dängge
und uns alle schöne Sache schängge,
und sag uns, wo sölls s'nägscht Johr duure
mir dien denn mit em Präsi schnuure,
dä isch denn für jede Fortschritt bereit
wenn alli meine: dr Chlaus hets gsait.

PS:
Und isches dusse schyssigs Wätter
schickt dr Chlaus sy Stellverträtter,
dä isch zwar krank, het mächtig Fieber
drum überlosst är s'rede denn doch lieber
sim Schmutzli, dä isch rund und chli
aber dä het doch wenigschtens sy Sack derby
e glatte Siech und naimedurre
het dä e glati frächi Schnuure.

E schöne Obe, mit viel Käs im Maage
Ich möcht so eifach Danggschön Sage.
 
Kurzschluss